2Th 3 | MMX | STEP | Luvutnetak mi luvurinuk. Na laxavaxap at na lovoang. Mina ngising ne Moroa do neni na lok tooro nama xusu levelinga at Leeme Silok na epeseves soso la limixin diba siam kaka i mi lomomo kerekngan nemi miga siam kaka i.

2 Thessalonians 3

Mina Ngising Tinama

1 Luvutnetak mi luvurinuk. Na laxavaxap at na lovoang. Mina ngising ne Moroa do neni na lok tooro nama xusu levelinga at Leeme Silok na epeseves soso la limixin diba siam kaka i mi lomomo kerekngan nemi miga siam kaka i. 2 La mina sing bok dola limixin kapmek di noxo ru pe lugugu atnama, mila buaang limixin mo, kopmen tunuunu atdi. 3 Ketla Leeme Silok i lok tooro ruturun amisik limixin teren la neni naba lox alolos lorooro atnimi la naba lok tatao nimi basinge ne Satan. 4 La nema ma nuunu bok do Leeme Silok i lok tooro ruturun nimi la na mi mumu asu levelinga atnama la melemu bok minaba mumu asu i. 5 La ma sing Leeme Silok do neni na lok tooro nimi xusu mina xasep avukat ti labalamu at ne Moroa, la mina tu lolos kerekngan ne Iesu Karisito ga tu lolos at lorooro ren.

Nemen Limixin Guta Molo At Lugugu

6 Luvutnetak mi luvurinuk. Ma sing nimi at laasen at Leeme Silok atdik ne Iesu Karisito, do mina ru asepsu basinge di nom limixin nuunu dik molo at lugugu, la kopmen dina mumu asu mo levenanasa nia aga anasa nimi min. 7 Nemi mi xasep do ik mokso rinimi xusu mina mumu asu mo loklok atnama, maga ruuna i ap mo levenaleng maga nemen kantubu atnimi. Maga gugu lolos, la ma goxok molo. 8 Ma goxo lok kaka gamasa tevempanga atnimi, maga un kaka leveluxa la levempanga vetpes bok magak pakes tin. Maga gugu lolos at levenaleng kangking la at levenaleng kanimin kusu mi noxo xepe pilas ti lok tooro nama. 9 Gak mokso do mana sing kaka tevempanga atnimi, ketla ma goxo lox i xuren; mila maga vara i do mana lok lampoovo xerepmo rinimi. 10 Maga nemen kantubu atnemi, la maga tong i rinimi xeretna, “Do tara i xopara na gugu, nemen gat ni ta anan eburu minimi.”

11 Ma tong i na rinimi mila magang tonga i do leventaba atnimi dik molo mene la dit pas tangtagap mi lavapaase siksikma la kopmen dina gugu. 12 At laasen at Leeme Silok ne Iesu Karisito ma tong lolos i ridi do dina nemen atnaasan la dina gugu ri levempanga dik pakes tin. 13 Luvutnetak mi luvurinuk, nemen mitak molo rik lok leven gugu i nunuan.

14 Do tara noxo ronga res at na levelinga, mina malagan katling i, la mina ke xepe i xusu neni na lok mamangan. 15 Nemen mita edax i, ketla mina paase aronga i ngan neton nimi.

Lavapaase Momo

16 A sing Leeme Silok at limila do neni xa na raba nimi mi limila ren at levenaleng axap la at leventaangas axap. Leeme Silok na nemen eburu amisik minemi axap.

17 Nenia ne Pol, a malagan na levengkolinga mi lakngak akmokso. Lavapaase momo rak tinimi. A malagan na levempoang keretna. ^{▼▼Pol ga sok mene nga na laxakan. La laradi vetpes ga malagan levelinga ne Pol ga vaase i min.}

18 Letaba nabalamu at Leeme Silok atdik ne Iesu Karisito na nemen eburu minemi axap. I ruturun.